The Hymns and Carols of Christmas

Synt Jon is Cristis Derlyng Dere

For the Feast of St. John the Evangelist
See:
Hymns To St. John The Evangelist

Words: Attributed to John Audelay

In die Sancti Johannis apopstole et ewangeliste.

         I pray youe, breder everechon,
         Worchip this postil, swete Saynt Jon.


Synt Jon is Cristis derlyng dere;
He lenyd on his brest at his sopere,
And ther he mad hym wonderful chere,
Tofore his postilis everechon.
         I pray youe, breder everechon,
         Worchip this postil, swete Saynt Jon.

“Saynt Jon,” He said, “my dere derlyng,
Take my moder into thi kepyng;
Heo is my joy, my hert swetyng —
Loke thou leve not here anon.”
         I pray youe, breder everechon,
         Worchip this postil, swete Saynt Jon.

“Jon, I pray thee, make here good chere
With al thi hert and thi pouere;
Loke ye to part not in fere
In wat cuntré that ever ye goon.”
         I pray youe, breder everechon,
         Worchip this postil, swete Saynt Jon.

“I comawnd youe, my postilis alle,
When my moder doth on youe calle,
Anon on kynes that ye down falle,
And do here worchip therwith anon.”
         I pray youe, breder everechon,
         Worchip this postil, swete Saynt Jon.

“I pray youe al, on my blessyng,
Kepe ye chareté for oné thyng;
Thenke what I said in your waschyng,
Knelyng tofore youe on a stone.”
         I pray youe, breder everechon,
         Worchip this postil, swete Saynt Jon.

“Farewel, now I wynd youe fro;
To Jerusalem I most goo,
To be betrayd of my fo,
And sofir payn and passiown.”
         I pray youe, breder everechon,
         Worchip this postil, swete Saynt Jon.”

“A, my Sun! My Heven Kyng!”
Oure lady therwith felle downe, sonyng —
This was a dolful departyng!
Thai toke here up with gret mon.
         I pray youe, breder everechon,
         Worchip this postil, swete Saynt Jon.

“A, my moder! Me dere derlyng!
Let be thi wo and thi wepyng,
Fore I most do my Fader bidyng,
Ellis redempcion were ther non.”
         I pray youe, breder everechon,
         Worchip this postil, swete Saynt Jon.

“Farewel, my Fader! Farewel, my Chelde!”
“Farewel, moder and maid mylde;
Fro the Fynd I wil thee childe,
And crowne thee quene in heven trone.”
         I pray youe, breder everechon,
         Worchip this postil, swete Saynt Jon.

Swete Saynt Jon, to thee we pray,
Beseche that Lord, that best may,
When our soulis schal wynd away,
He grawnt us al remyssion!
         I pray youe, breder everechon,
         Worchip this postil, swete Saynt Jon.

Print Page Return Home Page Close Window

If you would like to help support Hymns and Carols of Christmas, please click on the button below and make a donation.


Related Hymns and Carols